poesie

Francesco Salvatore Mario Squillace nacque a Montepaone il 7 dicembre 1927. Fu sacerdote, giornalista e scrittore. Scrisse molte opere di carattere storico, sociologico e teologico, tra le quali : " Vita eroica di Tommaso Campanella " - " Calabria democratica " - " Calabria vecchia e nuova ". Si spense a Montepaone il 10 novembre 1992.

Comu la luna è 'ncurunata 'e stelli,

tu sini 'ncurunata de collini

cu castagnari ed olivari belli

e 'ntra vallata aranci e mandarini.

T'abbrazzanu de' fianchi dui hjumari

chi dannu vita a campi ed orticeddhi,

refriscanu 'i nimali de' massari

e vannu 'ntro 'cchjù bellu de li mari.

Hai li bellezzi comu 'nu presepiu,

si 'recintatu 'e vichi e de vineddhi

cu chiddha bella chjazza 'ntra lu menzu,

ch'esta lu sbijiu 'e tutti li ziteddhi.

'A sira, quandu 'u sula va coddhandu,

de chiddhu affacciu chi si guarda a mara,

l'omu c'ava 'ntro cora sentimentu

pe' tutt'a vita mai ti pò scordara.

Benadiziona a chiddhu Patraternu

chi sup'e tia vozza 'u posa a manu !

Comu lu paradisu sini bellu,

tantu chi nuddhu 'e tia stacia luntanu.

Quandu mi sentu sulu e disturbatu,

chjno 'e penzeri pemmu tiru 'a vita,

recurru a tia, amicu tantu amatu,

e subitu mi passa chiddha prica.

Si caru a tutti, si 'na cosa fina,

porti la gioia e carmi ogni dolura,

tu fai 'mu canta a cui no 'nsa cantara

e chiddhu chi no 'parra 'u fai parrara.

Quantu si bellu, quandu da cannata

s'inchja 'u biccheri cu la curmatura !

Cu' cari amici e 'ncuna suppressata

si facia festa tutta la nottata.

Benediziona a chiddha manu cara

chi la vigna chjantau la prima vota !

E benaditta puru la recina

chi mungendula inchja la cantina.

Quanti liquori ava 'ntra lu mundu !

Ma tuna sini lu 'chju prelibatu,

de lu Signura tu sì benadittu

cà 'ntra la cena sua venisti usatu.

Cu parra mala 'e tia vorria sparatu,

'u megghju pranzu è nenta senza 'e tia,

tu sì la vera pacia de la casa

c'a tutti tu li porti l'allegria.

Quantu è gustusu poi lu 'mbriacuna

chi aza lu biccheri avanzi 'a lucia

tranganijandu 'ncuna gringia facia

e torcia 'u mussu e dicia :"A la saluta!"

Alfonzo Cutruzzolà, poeta contadino - come ama definirsi - è nato a Montepaone l' 8 ottobre 1931. Ha scritto " Aeri e oja", una raccolta di poesie in dialeto. Attualmente vive a Montepaone.

Ogni iornu facia sempa sa strata

iendu e benendu 'mbrazza mi tenia;

'ntesta portava 'na vrancata e ligna,

cà lu focu a la casa havia mu 'ngrugna.

'Nda passasti de' toi, si 'nda patisti

pemmu mi crisci o mamma, penijasti;

Ed eu de tutte chissu chi facisti

ringraziara ti vogghiu cu sti versi.

Sa strata vecchia e tia porrìa parrara !

Quantu voti a facisti cu pagura :

strittu 'ntra saia, o mamma, mi tenivi

'ntra nniva e gghiacciu scaza camminavi.

Pettu a lu ventu, o mamma, tu facivi,

mò avanzavi emmona arredi ti 'mbuttava,

mona a destra o a ssinistra ti curvava,

ma 'mbrazza sempa strittu mi tenivi.

Oh! Mamma, oh! Mamma bella ti ringraziu

de quantu amuri tuna eppi p'e mmia.

'Ntro sinu mi portasti e poi a lu mundu

n'omu randa facisti tu de mia.

A ttia , n'abbrazzu, a ttia nu grande baciu

supa sa testa tua chi ssi fà jianca :

'na preghiera rivolgiu a 'u Signura :

pemmu ti dà saluta u poi campara.

N'atri cent'anni mu ti fa vivira

mu ti 'nda scordi de chidha vita amara.

E a tutti quanti, mò, u pozzu dira

ca ti sacrificasti anima e cora.

Giuseppe Rattà nacque a Montepaone il 13 Novembre 1939. Fu vigile urbano di Catanzaro. Morì nel capoluogo calabrese il 24 dicembre 1986 durante un conflitto a fuoco in seguito a una rapina. Di lui è stato pubblicato un libro biografico " Tragedia a Catanzaro, il destino di un vigile urbano " che racchiude tutta la sua produzione di versi dialettali.

C.:	Bum, bum, tta, bum, chi ssu sti cannunati !
	De quala santu si facia la festa?

M.:	Li zziti sugnu de pocu schioppati,
	E tu mancu lu sai ? Si na repesta !
	Don Peppinu Pelaggi si spusau,
	e cu la ferruvia si la portau.

C.:	Ah! mo capisciu pecchì non vidìa
	Pe lu paìsa chistu galantomu !
	Stava nu misa ccà, poi si nda jìa.
	Lu fice ccittu ccittu! E chissu è omu !
	Cumpara de duv' esta ? è brutta ? è beddha ?

M.:	A chissu non li mancanu cerveddha !
	Duva ti cridi ca jìu mu si la trova ?
	A nu paisi dittu Palazzolu,
	De Napuli cchiù ddhà chi no nc'è nova;
	L'aceddhi non ci vannu mancu a volu.
	Iddu jìu, l'addhijìu comu la vozzi,
	E mò si fa la festa de li nozzi.

C.:	Non avia beddi pe chisti paìsi,
	'Nvecia chi pemmu jìa tantu luntanu ?

M.:	Chi l'avivi de fara, tu, li spisi,
	Ed alla vurza tua mu menti manu ?
	Cotrari ci nda sugnu ad ogni locu
	Ma comu chissa ci nda stannu pocu.
	A prima, aprima chi eu la smicciai
	( ca mi trovava a mmenzu na murrata )
	cridìa ch'era na stiddha e mi 'ncamai.
	Và cumpara, va' fatti na sonata
	Allegra, allegra cu li ciarameddhi,
	pemmu abballanu tutti li ziteddhi.
	Và vidi puru tu quanti alligrizzi !
	No ncesta unu chi non è cuntentu;
	S'affollanu li genti a chiddhi pizzi;
	Cù va, cù vena, e non si pigghia abentu:
	Acquaviva, rasoliu, mustazzoli,
	Cugghiandri chi nzuccari li moli,
	E' vernu, a sti timpuni fannu festa;
	Mandanu beddhi rosi a chista zita,
	U si fa na ghirlanda pe la testa;
	L'aguranu salute e lunga vita:
	Dòrculu e Grizzu scurranu cantandu
	E ad ogni parta jettanu lu bandu.

C.:	Devèru! nsin'a mò sempa vurraschi,
	E bentu e niva e cùcuddi a spaventu;
	E mò l'aceddi tornanu a li fraschi;
	Tuttu già si cangiau ntra nu momentu.
	A dira c'o borrìa lingua non aàju:
	Tornanu a jannaru lu mise de maju.

M.:	Gode puru lu cielu! Li pitturi
	Non saparianu fara si beddhizzi;
	Chiddha sua faccia jetta rosi e hiuri,
	Stralucianu a nu migghiu chiddhi trizzi,
	Non para cosa umana, ma divina,
	Si parra, si ti guarda, e si camina.

C.:	Puru, si tu mi fussi veru amicu,
	Ti diciarìa na cosa ...

M.:	Dimmi tuttu;
	Ch'eu tegnu li segreti e non li dicu.

C.:	De chissu matrimoniu s'ava fruttu ?
	o puru si nda passa stu cuntentu
	Comu tant'atri, e non si fa nun ghientu ?

M.:	No, no, cumpara, su de bona razza.
	Sacciu, ca pemme zzappa lu jardinu
	Lu jardinieri tena boni vrazza,
	E de chiantimi ficia nu vurvinu,
	A la criatura mu fanna na naca
	Perdeu! Ca chissa cucchia non scaca.

Le notizie su Gregorio Di Siena sono presenti nella sezione del sito " Uomini Illustri "